आदिनाथें उपदेश पार्वतीस केला – संत बहिणाबाई अभंग
आदिनाथें उपदेश पार्वतीस केला ।
मत्स्येंद्रें ऐकिला मच्छगर्भी ॥ १ ॥
शिवह्रदयींचा मंत्र पैं अगाध ।
जालासे प्रसिद्ध भक्तियोगें ॥ २ ॥
तेणें त्या गोरक्षा केलें कृपादान ।
तेथोनी प्रकट जाण गहिनीप्रती ॥ ३ ॥
गहिनीनें दया केली निवृत्तिनाथा ।
बाळक असतां योगरूप ॥ ४ ॥
तेथोनि ज्ञानेश पावले प्रसाद ।
जाले ते प्रसिद्ध सिद्धासनीं ॥ ५ ॥
‘सच्चिदानंद बाबा’ भक्तीचा आगरू ।
त्यासी अभयवरू ‘ज्ञाने’ केला ॥ ६ ॥
पुढें विश्वंभर शिवरूप सुंदर ।
तेणें राघवीं विचार ठेविलासे ॥ ७ ॥
केशव चैतन्य बाबाजी चैतन्य ।
झालेसे प्रसन्न ‘तुकोबासी’ ॥ ८ ॥
एकनिष्ठ भाव तुकोबा-चरणीं ।
म्हणोनी ‘बहिणी’ लाधलीसे ॥ ९ ॥
राम कृष्ण हरी आपणास या अभंगाचा अर्थ माहित असेल तर खालील कंमेंट बॉक्स मध्ये कळवा.
आदिनाथें उपदेश पार्वतीस केला – संत बहिणाबाई अभंग